Statsbudsjettet 2009: Ny stipendiatstilling, men realnedgang i totalramma

Rett nok får HVO ei ny stipendiatstilling, høgskulen har auka forskingsverksemd, men elles er det mest negative utviklingstrekk:
 

·På grunn av lave studenttal og studiepoengproduksjon i 2007 har vi ein nedgang i resultatbasert utdanningsløyving på knapt 6 mill kr. Heldigvis har vi godt opptak av studentar i år slik at vi reknar med vesentleg forbetring i 2010-budsjettet. Også andre høgskular i distrikta, i lag med høgskular i Akershus, Bergen, Bodø, Lillehammer og Universitet i Bergen slit i lag med oss.

·Vi har god auke i forskingsverksemd både knytt til publisering og prosjekt med forskingsrådfinansiering – vi har høgre verksemd enn gjennomsnittet, noko som gir oss ein inntektsauke på over 0,5 mill. kr. i belønning samanlikna med i år.

·Vi ser også positivt på at vi dei to siste åra har fått tre nye stipendiatstillingar, noko som vil hjelpe oss i samband med langsiktig rekruttering.

·Vi håper at nokre av dei nyoppretta studieplassane innan lærarutdanning og førskulelærarutdanning blir tildelt Volda, vi har klart høgst søking til slike studium av alle høgskulane i distrikta.

- Samla vurdert fører budsjettet til eit svært trongt budsjett for Høgskulen i Volda i 2009. Det gir svært lite rom til konkurransedyktige lønner for tilsette, for nysatsing innan undervisning, forsking og formidling og til forbetring av bygningar, inneklima og miljøtiltak, seier rektor Amdam.

- Den store utfordringa til Høgskulen i Volda er at vi har ei svært lav basisløyving. Medan denne var om lag 100.000 kr. pr. måltalsstudent for høgskulane generelt i 2008, var den berre 84.000 kr. for HVO. Denne forskjellen er ikkje endra i budsjettet for 2009, noko som gir ei mindreinntekt på snart 30 mill. kr. samanlikna med gjennomsnittet for høgskulane. Til samanlikning var basistildelinga til høgskulen i Molde 85.000 kr, Ålesund 119.000 kr. og Sogn og Fjordane med om lag same studieprogram som HVO 101.000 kr. i 2008, påpeikar Amdam.