Kjenner du ein eller fleire stjernelærarar på høgskulen?
Om du har opplevd forelesingar som har gjort deg stum av beundring, nyskapande undervisning eller noko heilt anna som utmerkar seg positivt med ein lærar eller eit fagmiljø – ta tastaturet fatt og send nominasjon til Pris for kvalitet i utdanninga 2023. Obs! Frist 1. november.
Om du har opplevd forelesingar som har gjort deg stum av beundring, nyskapande undervisning eller noko heilt anna som utmerkar seg positivt med ein lærar eller eit fagmiljø – ta tastaturet fatt og send nominasjon til Pris for kvalitet i utdanninga 2023. Obs! Frist 1. november.
Prisen blir delt ut kvart år ved Høgskulen i Volda, og er ei anerkjenning til eit fagmiljø eller enkeltpersonar som har gjort ein markert innsats i arbeidet for å utvikle den samla utdanningskvaliteten innan eit fagområde, studium eller eit emne ved Høgskulen i Volda.
Kva blir det lagt vekt på?
Ved tildeling av prisen skal det leggast vekt på systematisk innsats for å utvikle kvalitet i utdanninga og god tilrettelegging for studentane sitt læringsarbeid.
Det blir lagt vekt på god evne til formidling og samhandling med studentane, og bruk av nyskapande, varierte og studentaktive arbeids- og vurderingsformer.
Systematisk arbeid med mellom anna forskingsbasert undervising, internasjonalisering og studentevaluering vil også kvalifisere for prisen, i tillegg til innsats for eiga fagleg og pedagogisk utvikling.
Nominer her
Alle tilsette, studentar og formelle høgskule- og studentorgan kan kome med framlegg til kandidatar. Forslaga skal vere grunngitte. Frist for å nominere er 1. november.
Kan gi 50.000 kroner
Det er Høgskulestyret som tildeler prisen, etter innstilling frå Utdanningsutvalet. Tildelinga er planlagt å skje i styremøtet i desember.
Prisen er på 30.000 kroner til enkeltperson og 50.000 kroner til fagmiljø. Pengane skal nyttast til tiltak som fremjar vidare arbeid og utvikling med tanke på kvalitet i utdanning, til dømes studiereiser, konferansar, miljø- og nettverksbygging eller utstyr til utdanningsarbeid.
