Elisabeth Busengdal har disputert ved HVO

Fredag 24. november disputerte Elisabeth Busengdal for ph.d.-graden i helse- og sosialfag ved Høgskulen i Volda.

Elisabeth Busengdal disputerer ved HVO. — Elisabeth Busengdal under disputasen ved Høgskulen i Volda (HVO) fredag 24. november 2023. Foto: HVO / Steinarr Sommerset.

Fredag 24. november disputerte Elisabeth Busengdal for ph.d.-graden ved Høgskulen i Volda med avhandlinga Relasjonsbygging i kommunalt integreringsarbeid. Ein studie av implementering av integreringspolitikk og samarbeid på tvers av sektorar og styringsnivå.

I avhandlinga si for doktorgraden i helse- og sosialfag har Busengdal gjort ein kvalitativ kasusstudie av to norske kommunar med formål å studere samarbeid i implementering av politikk i det kommunale integreringsarbeidet.

Relasjonsbygging i kommunalt integreringsarbeid. Ein studie av implementering av integreringspolitikk og samarbeid på tvers av sektorar og styringsnivå er ei artikkelbasert avhandling. Busengdal undersøker ulike samarbeidsprosessar der kommunar set i verk integreringstiltak. Studien tolkar korleis dei arbeidde, kva som fremmar eller hemmar samarbeid, og kva som kjenneteiknar samarbeidsprosessane.

Den kunnskapen denne forskinga gir, kan vere viktig for å etablere samarbeid og bygge relasjonar i utviklinga av tenester og tiltak for flyktningar.

Dekan Jorunn Sem Fure ved ASH på HVO. — Dekan Jorunn Sem Fure ved Avdeling for samfunnsfag og historie introduserte doktoranden. Foto: HVO / Steinarr Sommerset.

Lik forståing og viktige eldsjeler

Funna i avhandlinga viser at det som kjenneteiknar samarbeidsprosessane, er at dei har hatt ei lik problemforståing i arbeidet med å finne løysingar. Det har ført til betre forankring for integreringsfeltet i leiing, politikk og administrasjon. Dette har gitt integreringsfeltet større handlingskapasitet i kommuneorganisasjonen fordi fleire aktørar er involvert. Dei har nytta kommunen sitt plan- og styringssystem til å samle relevante aktørar, sette ein felles agenda og skape tilslutning for arbeidet med flyktningintegrering i kommunen.

I tillegg indikerer funna at eldsjeler eller leiarar som har stort engasjement for fagfeltet, kan framstå som viktige for å sette ein felles agenda, opne dører og oppretthalde engasjementet for integreringsfeltet i kommuneorganisasjonen.

Doktorand Elisabeth Busengdal med rektor, dekan og hovudrettleiar. — Ein glad doktorand rett etter disputasen, flankert av HVO-rektor Odd Helge Mjellem Tonheim og dekan Jorunn Sem Fure ved Avdeling for samfunnsfag og historie. Heilt til høgre står HVO-professor Roar Amdam, som var hovudrettleiaren til Busengdal. Foto: HVO / Steinarr Sommerset.

Utfordrande samarbeid om integrering

Bakgrunnen for doktorgradsarbeidet er at integreringsfeltet opplever store utfordringar med å etablere samarbeid om integreringstiltak på tvers av sektorar og styringsnivå i kommunane.

Samtidig viser det seg at nettverksbygging og samarbeid mellom fleire aktørar og fagområde i kommunane er viktig for å forbetre tenester for flyktningar og kan gi betre introduksjonsprogram.

Dette gjer det interessant å studere slike samarbeidsprosessar og er bakgrunnen for doktorgradsarbeidet.

Elisabeth Busengdal under prøveforelesinga. — Doktorand Elisabeth Busengdal under prøveforelesinga med temaet «Det omstridde og utfordrande integreringsomgrepet». Til venstre ser vi bedømmingskommisjonen, som bestod av Lasse Koefoed (førsteamanuensis ved Roskilde Universitet), Torill Nyseth (professor ved UiT) og Kjersti Straume (førsteamanuensis ved HVO), og fremst i biletet følgjer hovudrettleiar Roar Amdam (professor ved HVO) nøye med. Medrettleiar Anne Britt Djuve (professor ved Fafo/OsloMet) var ikkje til stades. Foto: HVO / Steinarr Sommerset.

Om doktoranden

Elisabeth Busengdal (35) har mastergrad i samfunnsplanlegging og leiing frå Høgskulen i Volda (HVO) (2013–2015). Busengdal har også gjennomført Vestlandets forskarskule for pedagogikk- og utdanningsforsking (WNGER II) (2018–2022). Ho har Pedagogisk basiskompetanse frå HVO (2022) og bachelorgrad i Planlegging og administrasjon frå HVO (2010–2013) og har studert Equine Science ved Hòlar University College på Island (2007–2009).