Alle universitet og høgskular har stengt bygningane sine for studentar og tilsette fram til 13. april. Undervisning og eksamen som krev fysisk frammøte skal no gjennomførast digitalt.  – I vårsemesteret gjennomfører vi om lag 400 eksamenar. Om lag halvparten av desse var planlagt med fysisk frammøte i Volda, men no vert desse også lagt om til å skulle gjennomførast digitalt. Denne omlegginga gjer vi  samtidig som alle faglærarar arbeider for å tilby alternative undervisingsformer på nett, seier prorektor Odd Helge Mjellem Tonheim.

– Mange av studentane våre kjenner sikkert på uro og usikkerheit knytt til det å få gjennomført studieløpet på normal tid. Kva vil du seie til dei?

– Ta det med ro, pust og ha fokus på å studere! Vi arbeider hardt for å legge til rette for at alle studentane skal få gå opp til alle sine eksamenar i vår. Vi skal ha alle endringar i eksamenar på plass i god tid før påske. Ingen studentar ved Høgskulen i Volda (HVO) skal få store forseinkingar i sitt studieløp, seier prorektor Mjellem Tonheim.

Mjellem Tonheim peikar på at HVO tidleg valde  å legge om til digitale undervisingsformer og eksamensformer for resten av vårsemesteret 2020.

– Målet med dette er nettopp at resten av semesteret skulle verte så føreseieleg som mogleg både for studentar og fagtilsette, seier han.

 

Digital undervisning

HVO har lang erfaring med digital undervising og har bygt opp ein god infrastruktur som støttar godt opp under dette.

– Høgskulen i Volda har lenge hatt digital undervising i mange fag, mellom anna historie, vidareutdanningar for lærarar i norsk, matematikk, samfunnsfag, engelsk med fleire. Vi har også ei heildigital bachelorgrad, som, om eg ikkje hugsar feil, er den fyrste heildigitale bachelorgrada i Noreg, seier prorektor Mjellem Tonheim.

Ei utfordring er sjølvsagt at fagtilsette no sit på heimekontor der dei ikkje har tilgang til studioa og andre ressursar som dei normalt ville hatt.

– Vi meiner å ha funne gode løysingar. Vi har allereie gjennomført fleire kurs i eit nytt undervisingsverktøy (Zoom). Det er også viktig å presisere at alternative undervisingsformer ikkje betyr videoundervising, men kan også vere innslag av nettleksjonar, diskusjonsoppgåver i Canvas med meir. Her har fagmiljøa stor fridom til å finne det som fungerer best for sitt fag. Vi har også god brukarstøtte og opplæring frå eit veldig oppegåande IT-kontor og eit eige fagmiljø på digital kompetanse i læring, seier prorektoren.

Det finns nokre fagområde som byd på spesielle utfordringar. Det kan vere fag som musikk og forming som har mykje av aktiviteten sin i spesialrom som verkstader, øvingsrom og studio.

– Det er klart at vi har fagområde som er vanskelegare å gjere digitale enn andre. Til dømes vil ein del fag på Avdeling for kulturfag ha ein del ekstra utfordringar, men dette gjeld også fag på til dømes Avdeling for mediefag. Det gjeld også fag der ein legg opp til ei stor grad studentaktive læringsformer. Dette vert løyst på ulike måtar frå fag til fag, og vi veit at faglærarane er svært kreative i å finne gode løysingar for sine fag.

– Kan studentane vere trygge på at dei får den undervisninga dei etter planen skal ha?

– Klart studentane som normalt skulle ha undervising på høgskuleområdet ikkje får eksakt den undervisinga dei etter planen skulle hatt. Men eg er trygg på at alle studentar får god og forsvarleg alternativ undervising av høg kvalitet. Og at alle våre tilsette arbeidar for at studentane får eit best mogleg studietilbod i den situasjonen vi no er, understrekar prorektor Odd Helge Mjellem Tonheim.

Digital eksamen

– Korleis arbeider HVO for å sikre at studentane får gjennomført eksamen digitalt?

– Per no ser vi at det er nesten 200 eksamenar som må flyttast frå fysisk frammøte i Volda og over til digitale plattformer. Dette er eit arbeid som går i rekordfart. Her er det det enkelte fagmiljø som vurderer kva som er den beste alternative digitale eksamensforma for deira fag. Dei melder dette så inn til studieadministrasjonen som dobbeltsjekkar kollisjonar med andre eksamenar, og til slutt godkjenner eg kvar og ei endring. Kva eksamen som høver best er opp til kvart enkelt fagmiljø å avgjere, slik at her vil det kome ulike løysingar. For nokre fag er det naturleg å erstatte munnleg eksamen med munnleg eksamen via videoløysingar, for andre fag vert dette vanskeleg og dei kan då vurdere at det beste for mitt fag vil vere ein digital skriftleg heimeeksamen, og atter andre igjen kan lande på at ein digital heimeeksamen med innlevering av ein video er den beste løysingar. Slik at her vil vi sjå at det er ulike løysingar, men alle endringar i eksamensformer har eit sams fokus, nemleg korleis studenten kan best mogleg få fram sitt læringsutbytte i faget, seier prorektor Mjellem Tonheim.

– Kva er dei mest krevjande utfordringane?

– Det må utan tvil vere at vi prøvar no å endre 200 eksamenar i løpet av ei veke. Her er det mykje som må sjekkast, dobbeltsjekkast og trippelsjekkast. Til dømes skal ein student gjerne ta fleire eksamenar, og det er viktig at desse ikkje kolliderer. Vidare er informasjonen ut til studentane om endringane også veldig viktig. Informasjon om endringane kjem i Canvas, direkte frå faglærar, etter at endringa er godkjent av meg. Studentweb og emneplanar vert oppdatert fortløpande, men dette vil framleis ta litt tid, då der er veldig mykje som skal endrast på.

Praksis

– Mange studium ved HVO har obligatorisk praksis. Kan du kort kommentere korlei HVO finn alternativ når praksis ikkje let seg gjennomføre?

– Mange av våre utdanningar var ferdige med praksis før denne krisa sette inn. Vi veit at det gjenstod noko praksis på mediefag og på lærarutdanningane. Men dette vert ordna ved at dei har alternative former for praksis, til dømes ved at ein får praksisnære oppgåver og eventuell digital kontakt med praksislærarar og liknande, seier Mjellem Tonheim.