Inspirerande korseminar

Tekst: Per Arne Brandal

15. februar 2022 - Oppdatert 15. februar 2022

– Korseminaret med Jon Lotterud er artig og inspirerande. Han er flink, og han har eit spennande repertoar. Det er kjekt å få synge songar av kjende popartistar som The Police, Beatles, Aha og Queen, seier Mathilde Strøm som går andre året på bachelorutdanninga i musikk.

I tre dagar skal studentane ved musikk årsstudium og den treårige bachelorutdanninga i musikk synge saman, lære om korinstruksjon og bli inspirerte til vidare korarbeid. Det heile vert avslutta med ein konsert i konsertsalen i Kaarstad-huset onsdag 16. februar.

Musikkstudentar korseminar — Nikolai Gagmat, Mathilde Strøm, Vid Karsrud Greksa og Tobias Osvik likar å synge i kor. – Tangokonserten med kor og orkester vi hadde i fjor var eit høgdepunkt, seier dei.

– Den gode opplevinga av å synge i kor

Den røynde musikaren og korinstruktøren Jon Lotterud frå Gjøvik har lang røynsle med slike seminar for ulike skuleslag og aldersgrupper.

– I store delar av året reiser eg rundt og held slike seminar for kor, for elevar på folkehøgskular og for menneske i ulike andre lag og grupperingar. Når ein har so kort tid til rådvelde som her, er det viktig å finne musikk som ikkje er for vanskeleg men som likevel gir studentane ei god oppleving av det å synge i kor, seier han.

Samspelprosjekt

Musikkutdanningane i Volda har som mål å gi studentane gode kunnskapar og ferdigheiter innanfor musikkutøving og formidling, komponering og arrangering, musikkpedagogikk og instrumentaldidaktikk. I Volda er det eit rikt musikkliv, og høgskulen har eige kor og symfoniorkester.

– Det vi gjer desse dagane er ein del av emnet vi kallar samproduksjon. Her legg vi vekt på at studentane samarbeider, syng eller spelar saman i grupper og framfører det dei har øvt inn. Dagane skal også vere til inspirasjon for høgskulekoret, seier høgskulelektor Svein Hunnes ved musikkutdanninga ved Avdeling for kulturfag.