Vidareutdanning i barnevernfagleg rettleiing i samarbeid mellom HiSF og HVO
Barne- og likestillings- og inkluderingsdepartementet har gitt høgskulane i Sogndal og Volda oppdrag å tilby vidareutdanning i rettleiing for tilsette i barnevernet.
Kurset skal heve kompetansen til dei som har ansvar for rettleiing av nytilsette i barnevernstenesta og studentar som er ute i praksis, og gi nye medarbeidarar i barnevernet god oppfølging og innføring i eit utfordrande yrke. Tilbodet er lekk i departementet sitt arbeid med å utvikle og styrke barnevernstenestene, og tiltaket blei lyst ut på anbod tidlegare i år.
Det er i alt 6 fagmiljø som får sette i gang, og Sogndal/Volda-miljøet er åleine om dette utdanningstilbodet mellom Stavanger og Tromsø. Dei andre som får sette i gang er Universiteta i Stavanger, Agder og Tromsø, Høgskulen i Oslo-Akershus og Diakonhjemmet.
Utdanninga er på masternivå og gir 30 studiepoeng, delt i to emne. Institutt for barnevern, sosialt arbeid og vernepleie i Sogndal har hovudansvar for emnet «Rettleiingspedagogikk og eiga rolle som rettleiar», og Institutt for sosialfag ved HVO har hovudansvar for emnet «Profesjonell rettleiing for nyutdanna og nytilsette i barnevernstenesta».
Ingrid Fossøy, Anne Marie Verpe, Unni Uren Aasen, Rune Kvalsund og Hallgerd Conradi.
Ansvarlege for det faglege innhaldet i kursa er professor Rune Kvalsund og høgskulelektor Anne Marie Verpe frå HVO og dosent Ingrid Fossøy og høgskulelektor Brit-Marie Follevåg frå HiSF.
Studietilbodet er planlagt som deltidstilbod over eitt år, og er lagt opp med samlingar ved høgskulane og fagleg arbeid mellom samlingane. Første året går begge tilboda i Sogndal, andre året er det Volda som er arrangørstad.
