Ekskursjon til fylkeskommunen og fylkesmannen

På fylkeshuset vart dei godt mottekne av tidlegare kollega på instituttet, Sveinung Dimmen. Han er no tilsett som samordnar av planarbeid hos fylkesmannen og gav Volda-studentane ei fin innføring i fylkesmannen si rolle andsynes dei andre forvaltningsnivåa på fylkesplanet.

Utviklingsarbeid
Fylkesplansjef Ole Helge Haugen gav ei innsiktsfull orientering om fylkeskommunen si rolle i utviklingsarbeid. Han la vekt på kravet om å byggje alt kommunalt planarbeid på ein formell fireårig strategi, samt det sentrale kravet om medverknad i den nye plan- og bygningslova og kva konsekvensar slike krav har for den praktiske kvardagen til planleggjaren.

Universell utforming
Utover dagen fekk studentgruppa gode, faglege skildringar om fylkeskommunen sitt målretta arbeid for å få universell utforming implementert i krikar og krokar av alle former for planarbeid. Først ut var seniorarkitekt Eva Spirdal-Jacobsen som synte konkrete døme på praktiske utfordringar personar med ulike føresetnader møter i kvardagen. Vidare tok Geir Olsen og Jorunn Sølvberg frå samferdsleavdelinga i fylkeskommunen oss med på forteljingar om universell vegutforming og utfordringar som kollektivt reisande funksjonshemma kan ha i kvardagen.                  

Framtidas planformarar
Ekskursjonen til Molde vart avslutta med omvising i det nye teater- og jazzhuset Plassen. Studentane fekk her ein smak av både byggjeprosess, driftsopplegg og fysisk utforming, noko som, i tillegg til alt det andre fagleg baserte stoffet frå denne dagen, skal vere med å ruste studentane til å bli dugande leiarar og planformarar i framtida.

Tekst og foto: Kolbein Halkjelsvik