Oppstart av Masterkurs i dokumentarfoto våren 2015
Kurset er ope for søkarar med bachelorgrad eller tilsvarande og med grunnleggande praktisk kunnskap om reportasjefotografering. Tilbodet er avgrensa til maksimum 25 deltakar. Fagleg ansvarleg er Dr. Stuart Franklin, medlem av og tidlegare leiar av bildebyrået Magnum.
Kurset er utvikla for studentar som vil utvikle sine evner som utøvande dokumentarfotografar, eller som ynskjer å utvikle si akademiske forståing av temaet dokumentarfoto. Obligatoriske arbeidskrav omfattar fire praktiske oppgåver av stigande vanskegrad, der studentane planlegg og gjennomfører reelle prosjekt i felten.
Foto: Stuart Franklin, Magnum Foto.
Undervisninga skjer i fem konsentrerte vekesamlingar i Volda siste veke i kvar månad januar til mai. Prosjekt gjennomført mellom samlingane blir evaluerte i plenum og individuelt som del av undervisninga ved desse samlingane, i tillegg til førelesingar over ulike tema innan emnet. Eksamen er valfri praktisk/teoretisk med hovudvekt på det praktiske, eller reint teoretisk, og skjer ved innlevering av eksamensarbeid innan gitt frist i juli.
Kurset kan takast som frittståande studium, eller inngå som del av Høgskulen i Volda sitt masterløp i Dokumentar og Journalistikk eller tilsvarande masterløp ved andre institusjonar. Informasjon om masterløpet fins på www.hivolda.no – For studentar – Studieplanar – Dokumentar og journalistikk.
Søknader på engelsk, med CV og portfolio blir løpande behandla fram til 15. januar 2015 eller til kurset er fullteikna. Utfyllande emnebeskrivelse fins på våre heimesider; www.hivolda.no – For studentar – Emneplanar – DJM311 Documentary Photography. Spørsmål kan rettast til Dr. Stuart Franklin; [email protected] eller til Gaute Hareide; [email protected]
Etter det vi kan sjå er dette det første undervisningstilbodet på masternivå innan fotofaget i Norge.
